Në ditën e dytë të qëndrimit në Greqi, Ministri Bushati zhvilloi një takim me Kryetarin e Demokracisë së Re, Kyriakos Mitsotakis.

Gjatë takimit palët diskutuan për zhvillimet më të fundit në Shqipëri dhe Greqi, situatën në rajon dhe më gjerë. Kreu i Demokracisë së Re, Mitsotakis e njohu Ministrin Bushati me vështirësitë në të cilat kalon Greqia dhe rolin e kësaj force politike në përballimin e krizës. Ministri Bushati u ndal në vëmendjen e veçantë që i kushton Shqipëria zhvillimeve në Greqi dhe shprehu solidaritetin për momentet e vështira që kalon vendi fqinj.

Bashkëbiseduesit ndanë vlerësimin e përbashkët se fuqizimi i vazhdueshëm i marrëdhënieve me rëndësi strategjike ndërmjet vendeve tona, fqinjë, anëtarë të NATO-s, dhe gjithnjë e më afër në planin evropian, është me rëndësi jetike në planin dypalësh, si dhe i shërben të ardhmes evropiane të rajonit.

Ministri Bushati u ndal në rëndësinë strategjike të raporteve dypalëshe dhe vëmendjen e veçantë që i kushton Shqipëria thellimit të mëtejshëm të kësaj marrëdhënie, si dhe nevojën për një komunikim të hapur me të gjithë aktorët në të dy anët në funksion të rritjes së frymës së besimit.

                                             *                    *                *                                             

Ministri Bushati ishte i ftuar nga Fondacioni grek për Politikën e Jashtme dhe Evropiane, ELIAMEP për të diskutuar mbi rëndësinë e marrëdhënieve shqiptaro-greke në kontekstin aktual.

Të ftuar në aktivitet ishin përfaqësues të Trupit Diplomatik në Greqi, studiues, gazetarë dhe njohës të raporteve dypalëshe.

Në fjalën e tij Ministri Bushati u ndal në dimensionin historik të raporteve dypalëshe, ndërvarshmërinë e kësaj marrëdhënie strategjike dhe jetike për dy popujt tanë, rrugëtimin evropian të Shqipërisë dhe rajonit.

Gjithashtu, ai evidentoi rëndësinë e vijimit të procesit të nisur, të trajtimit pa tabu dhe gjetjes së zgjidhjeve për çështjet e trashëguara mes palëve, çështjet e aktualitetit dhe të së ardhmes sonë të përbashkët, bashkëpunimit ekonomik, zhvillimet në rajon dhe integrimin evropian të Ballkanit Perëndimor. "Para se të mund të ndërtojmë diçka të rëndësishme së bashku, duhet së pari t'i japim fund Luftës së Dytë Botërore", theksoi Ministri Bushati

Ministri Bushati iu përgjigj pyetjeve dhe interesit të Trupit Diplomatik, gazetarëve dhe studiuesve, mbi raportet dypalëshe, situatës në rajon dhe perspektivës evropiane të vendit tonë