Shqip
English
2016 shënon një vit të rëndësishëm për marrëdhëniet e shkëlqyera që ekzistojnë ndermjet Shqipërisë dhe Austrisë, pasi shënojnë 94 vjetorin e vendosjes për herë të parë të marrëdhënieve diplomatike mes vendeve tona, si dhe 60 vjetorin e rivendosjes së tyre.
Në këtë kontekst, Ministria e Punëve të Jashtme, në bashkëpunim me Ambasadën Austriake në Tiranë, organizuan ditën Shqiptaro - Austriake e cila nisi në ambientet e MPJ-së me organizimin e një konference shkencore me temë “Shqipëri – Austri: Reflektime mbi 60 vjet rivendosje të marrëdhënieve diplomatike”.
Konferenca u përshëndet nga Zëvendësministrja e Punëve të Jashtme Odeta Barbullushi dhe Ambasadori austriak në Tiranë Johann Sattler. Në dy panelet e konferencës morën pjesë albanologë e historianë shqiptarë e austriakë, si edhe gazetarë, shkrimtarë, përfaqësues të trupit diplomatik dhe të ftuar të tjerë.
Në vijim, pranë Muzeut Historik Kombëtar u zhvillua Mbrëmja Shqiptaro-Austriake. Gjatë kësaj mbrëmjeje, e cila u përshëndet nga Ministrja e Zhvillimit Ekonomik, Tregtisë Turizmit dhe Sipërmarrjes Milva Ekonomi, u ekspozuan fotografi historike të dy vendeve nga albumi i konsullit të nderit të Austrisë, Gjergj Leqezja, si edhe revista dhe libra nga Biblioteka Kombëtare.
Me këtë rast, Ministria e Punëve të Jashtme prezantoi numrin e parë të revistës diplomatike të Ministrisë së Punëve të Jashtme DiploMag2016, e cila ka në fokus 60-vjetorin e rivendosjes së marrëdhënieve diplomatike mes dy vendeve.
